Gesteelde skape terug
Vryburg - Twee verdagtes is verlede week hier in hegtenis geneem op 'n klag van veediefstal nadat 'n aantal gesteelde skape in hul besit gevind is.
Volgens kapt Adele Myburgh, Noordwes polisiewoordvoerder, is die skape, een ram en ses ooie met hul lammers, op Donderdag (15 April) by een van die plase in die omgewing gesteel. Myburgh vertel dat die eienaar van die skape op daardie stadium in die Kaap was toe sy buurman hom gebel en in kennis gestel het van die diefstal.
Op Maandag (3 Mei) het die Veediefstal Eenheid inligting ontvang rakende dié gesteelde skape. Nadat die inligting opgevolg is, is van die skape in die Bothitong nedersetting naby Kuruman gevind. Volgens Myburgh is slegs die ram, drie ooie en vyf lammers teruggevind. Die verdagtes, onderskeidelik 44 en 45 jaar oud, word volgens Myburgh ook verbind met ander veediefstal sake wat tans verhoorafwagtend is.
|